{"id":1103,"date":"2017-11-04T13:50:16","date_gmt":"2017-11-04T12:50:16","guid":{"rendered":"http:\/\/www.abellacreativa.com\/?p=1103"},"modified":"2017-11-04T13:50:16","modified_gmt":"2017-11-04T12:50:16","slug":"os-homes-de-xeo-de-carlos-prado-illa-de-arousa","status":"publish","type":"post","link":"https:\/\/www.abellacreativa.com\/index.php\/2017\/11\/04\/os-homes-de-xeo-de-carlos-prado-illa-de-arousa\/","title":{"rendered":"Abella Creativa colabora na proxecci\u00f3n de \u00abOs homes de xeo\u00bb na Illa de Arousa"},"content":{"rendered":"
\n

O xornalista de Mogor, Carlos Prado Pamp\u00edn, presenta na Illa de Arousa, un documental sobre a Ant\u00e1rtida<\/h1>\n

O traballo audiovisual, Homes de xeo, conta a vida de tres persoas galegas no polo sur a bordo do buque Hesp\u00e9rides.<\/h2>\n

O xornalista e realizador audiovisual Carlos Prado Pamp\u00edn presenta o vindeiro s\u00e1bado 11 de novembro \u00e1s 20:00 horas no Auditorio Municipal da Illa de Arousa, o documental Homes de xeo: galegos na Ant\u00e1rtida, unha obra rodada no polo sur durante a s\u00faa viaxe a bordo do Hesp\u00e9rides o pasado mes de febreiro.
\nO autor de Mar\u00edn estivo na Ant\u00e1rtida como enviado especial da La Sexta Noticias<\/a>, canle de televisi\u00f3n na que traballa dende hai 10 anos, para realizar unha serie de reportaxes sobre o cambio clim\u00e1tico e as s\u00faas consecuencias no continente de xeo. Froito da viaxe, naceu a idea de rodar un documental propio. \u201cCando comprobei que o barco estaba cheo de galegos, tanto mari\u00f1os coma cient\u00edficos. Ent\u00f3n tiven a ocorrencia de rodar como viven os nosos paisanos o d\u00eda a d\u00eda nun entorno como \u00e9 a Ant\u00e1rtida dentro dun barco durante 6 meses\u201d, conta Carlos Prado.
\nO documental Homes de xeo, narra, a trav\u00e9s da experiencia e as voces de tres galegos, o xefe de coci\u00f1a do barco, un cient\u00edfico, e o patr\u00f3n de embarcaci\u00f3ns do Hesp\u00e9rides, como \u00e9 a vida na Ant\u00e1rtida, o traballo que al\u00ed desempe\u00f1an, as marabillas que agocha o polo sur, a morri\u00f1a que senten a 15.000 quil\u00f3metros da casa, ou as consecuencias do cambio clim\u00e1tico, entre outros temas. \u201cPretendo que todos co\u00f1ezamos e valoremos un pouco mais a vida dos galegos en alta mar, como \u00e9 o seu traballo entre o xeo, o que pensan e senten, e o mesmo tempo quero amosa-la importancia que ten a Ant\u00e1rtida para a sa\u00fade do planeta e como o quecemento global comeza a afectar a esta paisaxe. Todo a trav\u00e9s dos ollos de tres galegos\u201d, explica o reporteiro de Mar\u00edn.
\nAs condici\u00f3ns especiais da Ant\u00e1rtida, onde o xeo, o fr\u00edo, os animais salvaxes, os glaciares, as tormentas\u2026 est\u00e1n \u00e1 orde do d\u00eda, provocan que a convivencia no buque de investigaci\u00f3n oceanogr\u00e1fica Hesp\u00e9rides sexa \u201cm\u00e1is intensa e pr\u00f3xima, cun gran compa\u00f1eirismo entre a tripulaci\u00f3n, coma unha gran familia que traballa unida. O ambiente a bordo do buque \u00e9 fant\u00e1stico, dende o\u00a0 primeiro momento no que sub\u00edn ao barco, sentinme coma na casa\u201d, asegura Prado Pamp\u00edn. E non \u00e9 para menos, entre a tripulaci\u00f3n do Hesp\u00e9rides da campa\u00f1a Ant\u00e1rtica 2016\/2017, Carlos Prado atopouse con dous veci\u00f1os de Mar\u00edn e unha decena de galegos.
\nO pase do documental ser\u00e1 no Auditorio Municipal da Illa de Arousa onde intervir\u00e1 o propio autor, Carlos Prado Pamp\u00edn. A entrada ten un custe de 2 \u20ac.
\nEntre os traballos m\u00e1is co\u00f1ecidos de Carlos Prado Pamp\u00edn atopamos a curtametraxe de ficci\u00f3n Vellas, protagonizada pola avoa de Carlos e por unha veci\u00f1a de Mogor. A curta foi finalista dos Premios Mestre Mateo 2008 na categor\u00eda de curtametraxe de ficci\u00f3n e finalista no festival de Cans 2008 (O Porri\u00f1o).
\nCarlos Prado tam\u00e9n \u00e9 o realizador da curta-documental \u201cA mano o a m\u00e1quina\u201d, un traballo que viralizou nas redes sociais e superou o mill\u00f3n de visitas. Amosa a simp\u00e1tica conversaci\u00f3n de d\u00faas xubiladas galegas (de novo a s\u00faa avoa Malita e a s\u00faa veci\u00f1a Aurita) sobre as novas tecnolox\u00edas nunha fonte de Mogor, mentres lavan a roupa a man.
\nPrado Pamp\u00edn tam\u00e9n conseguiu o Premio internacional BEFESA de xornalismo medioambiental 2016 polo seu traballo nas novas da Sexta televisi\u00f3n.<\/p>\n<\/div>