Superpunky El Musical curtametraxe galega

Ficciónate converte Ribadeo na capital da curtametraxe galega


* O sábado 13 de xaneiro ás 20.00h no Teatro de Ribadeo preséntase Ficciónate, o primeiro ciclo de cine galego de curta duración que busca amosar os traballos dos novos talentos e alentar as novas xeracións a que produzan e creen industria creativa.

* No ciclo proxéctanse as obras Illa Pedra (protagonizada por María Tasende e Nerea Barros), Einstein-Rosen (Premio Mestre Mateo 2017 á Mellor Curtametraxe de Ficción), Curricán (Premio do Festival de Cans en 2015) e Superpunky, El Musical (apodado o “La la land galego”).

* O ciclo percorrerá diferentes concellos de Galicia proxectando estas obras coa presenza de representantes de cada filme.

* Ribadeo é a sexta parada dun tour que percorrerá diferentes cidades e vilas galegas como Malpica, Pontevedra, Malpica e Oleiros entre outras.

* A entrada será libre ata completar aforo.

O sábado 13 de xaneiro ás 20.00h no Teatro de Ribadeo, Ficciónate, o ciclo de cinema galego desenvolvido por novos talentos do audiovisual galego, continúa a súa marcha. Catro curtametraxes de ficción que viron a luz durante os últimos anos e que unen forzas para pescudar novas vías de exhibición e colaboración conxunta para facer chegar estas obras de pequeno formato ao gran público. Entre un total de 29 filmes candidatos na fase de presentación, foron seleccionadas 4 obras: Illa Pedra de Adriana Páramo, Einstein-Rosen de Olga Osorio, Curricán de Álvaro Gago e Superpunky, El Musical de Pablo Cacheda.
Na primeira edición deste ciclo, foron un total de 9 as localidades que acolleron as proxeccións das obras Rancor, El Comediante, Fálame do silencio e Unary. Estas curtametraxes viaxaron en 2016 a Illa de Arousa, Negreira, Sarria, Pontevedra, Ferrol, Santa Comba, Burela, San Sadurniño e A Coruña.
Tralas proxeccións, os asistentes terán a ocasión de compartir a experiencia cos artífices das obras dende diferentes ámbitos do eido audiovisual: a dirección, a produción, a fotografía, a promoción e a interpretación. A súa vez, nesta segunda edición, incorpórase un aperitivo gastronómico con produtos galegos, cortesía de Ingapan, Fontecelta, Pazo de Anzuxao, Adega Terra Brava e Embutidos Casa Neiras.

Os filmes tratan temáticas de rigorosa actualidade. Illa Pedra é unha curtametraxe de Adriana Páramo protagonizada por María Tasende e Nerea Barros que aborda o tema de emigración. Con tintes autobiográficos, a directora cóntanos a historia de Antía, quen deixa a súa terra e a súa mellor amiga Iria séntese traizoada.

Einstein-Rosen de Olga Osorio (premiada en diversos festivais e gañadora do Premio Mestre a mellor curtametraxe 2017) narra a historia de dous irmáns, que, no verán do ano 1982 aseguran atopar un buraco de verme. Pola súa banda, Curricán de Álvaro Gago, narra as aventuras de Xoan Curricán na mariñeira Vilanova de Arousa, a súa vinculación co mar e o quefacer diario dun rapaz de aldea co seu avó e irmán. E dado que este ano os musicais están en plena efervescencia grazas ó fenómeno “La la land”, o musical Superpunky pecha a selección desta nova edición de Ficciónate. Protagonizado por Antea Rodríguez e Sabela Arán e coas notas musicais dos grupos Priscila e Monoulious DOP. Unha selección diversa en canto a temática, xénero e concepto audiovisual.

Ficciónate é unha iniciativa de Abella Creativa en coprodución con MT Producciones e coa colaboración de Adega Terra Brava, Pazo de Anzuxao, Ingapan, Casa Neiras e Fontecelta.

Deixar un Comentario

O teu enderezo electrónico non se publicará Os campos obrigatorios están marcados con *